حەمید عوسمان: هونەری رەسەنی خۆمان خەریكە بەرەو نەمان دەچێت

barzy

یەكەمجار لەسەر ستەیج، لەبەردەم هونەرمەندی كۆچكردوو حەمەجەزا، مەقامێكی ئەو هونەرمەندەی گوتەوە. حەمەجەزا دوای دەستخۆشی، پێیگوتووە “هیوادارم بەردەوام بی، هەر شتێكیشت ویست، خاڵی خۆت لە خزمەتتدایە”.

گۆرانیبێژی گەنج حەمید عوسمان ساڵی 1985 لە گەڕەكی ئیبراهیم پاشای سلێمانی لەدایك بووە. تاوەكو سێی ناوەندی خوێندووە. لەم هەڤپەیڤینەدا  باسی كارە هونەرییەكانی خۆی دەكات.

 دەڵێن زۆربەی تەمەنی منداڵیت بە كاركردن بەڕێ كردووە؟

حەمید عوسمان: بەڵێ‌ راستە. باوكم جگەرچی بوو لای ئەو كارم دەكرد. لە هاوینانیشدا رۆژانی هەینی لە گۆڕستان رێحانە و ئاوم دەفرۆشت. دوای وازهێنان لە خوێندن بوومە شاگردی بەرگدروو، پاشان تەنەكەچی ئۆتۆمبێل و بۆیاخچێتی.

بە گوتنەوەی گۆرانییەكانی حەمەجەزا زۆر ناسرای، دۆستایەتیتان هەبوو؟

حەمید عوسمان: بەڵێ، چەند جارێكیش ئەو هونەرمەندە مەزنەم لە نزیكەوە بینی.

 كەی دەستت بە گۆرانیگوتن كرد؟

حەمید عوسمان: بۆ یەكەمجار لە ساڵی 1999 لە رێگەی منداڵپارێزیی كوردستان لەلای ژمارەیەك هونەرمەندی بەتوانا بە گۆرانیی منداڵان دەستمپێكرد. لە دوو فێستیڤاڵی ئەو رێكخراوەشدا خەڵاتی باشترین گۆرانیبێژم وەرگرت، بەڵام دواتر هەوڵم دا گۆرانی بۆ گەوران بڵێم. ساڵی 2005 بۆ یەكەمجار لەسەر ستەیج لە كەناڵی كوردسات گۆرانیم گوت، هونەرمەندی كۆچكردوو مامۆستا حەمەجەزا لەوێ‌ بوو، مەقامێكی ئەوم گوتەوە بەنێوی بووكی ئازادی. دوای بەرنامەكە مامۆستا حەمەجەزا دەستخۆشی لێكردم و پێیگوتم هەر شتێكت ویست خاڵی خۆت لە خزمەتتدایە.

 بۆچی بە لاساییكردنەوە دەستتپێكرد؟

حەمید عوسمان: ئەو لاساییكردنەوەیە سەرنجی گوێگرەكانم رادەكێشێت، چونكە هونەری رەسەنی خۆمان خەریكە بەرەو نەمان دەچێت، من دەتوانم بەو گۆرانییانە خزمەتی خۆم و هونەرمەندەكە و هونەری كوردیش بكەم.

رووداو: لە لاساییكردنەوە بەردەوام دەبیت؟

حەمید عوسمان: بۆ لەمەودوا وەكو خۆم دەیانڵێم، بەڵام تاموچێژی هونەرمەندەكەی لێ نابڕم.

گۆرانیی گوڵچین گەشتێك بوو بەنێو گۆرانییە كۆنەكاندا كە پێی ناسرای، ئەو بیرۆكەیە چۆن بوو؟

حەمید عوسمان: پێش منیش چەند هونەرمەندێك گۆرانییان بەشێوەی گەشت گوتبوو، كاری باش بوون، بۆیە منیش گەشتم هەڵبژارد. سەرەتا ویستم تەنیا چەند گۆرانییەكی مامۆستا حەمەجەزا بڵێمەوە، بەڵام زانیم توانام هەیە گۆرانی هونەرمەندانی دیكەش بڵێمەوە، بۆیە بیرۆكەكەم گۆڕی.

 كەسوكاری هونەرمەندەكان هیچیان نەگوت؟

حەمید عوسمان: هەموویان پێیان خۆشبوو، ئێستاش بەنیازم كار لە گوڵچینی دووەمدا بكەم و ئەمجارە شێوازی كۆیە و گەرمیان و حەیرانیش هەڵدەبژێرم.

 دەگوترێت زۆر حەزت لە دوێتە، بەرهەمێكت لەگەڵ چنار هەیە، لەگەڵ كێی دیكە دوێت دەكەی؟

حەمید عوسمان: دوێت لە هەموو دنیای هونەردا هەیە و بە كارێكی جوانی دەزانم. هەر هونەرمەندێك كە لە منداڵیدا هەستمی جوڵاندبێت حەز دەكەم دوێتی لەگەڵدا بكەم، بۆ خاتوو چنار تاڕادەیەك ئاواز و دەنگ و ستایلمان لە یەكەوە نزیك بوو. بەنیازم لەگەڵ پەیوەند جاف دوێت بكەین، كارەكانی دوێتەكە تەواوبوون، هەروەها لەگەڵ كاك كەمال محەممەد دوێتێك دەكەین.

چەند ساڵێكە هونەرمەندان روویان كردووەتە كۆنسێرتی كافتریاكان، تۆش سەرەتا بەشداریت دەكرد، بەڵام وازت هێنا، بۆچی؟

حەمید عوسمان: نامەوێت لەو ئیشە كەم بكەمەوە، چونكە هەموو هونەرمەندێك ئازادە چۆن كار دەكات، بەڵام وەكو خۆم ساڵانی 2007 تا 2013 لایڤ موزیكم لەو شوێنانە كردووە كە خێزانین و بۆنەكانی نەورۆز و جەژنی سەری ساڵ، بەڵام لەمەودوا ناتوانم ئەوە بكەم. لەبەرئەوەی ئەو نرخەی دایانناوە نرخی ئەو هونەرمەندە و ئەو هونەرە نییە كە پێشكەشی دەكەن، هەروەها شێوازی رێكخستنی ئاهەنگەكانیش، چونكە هەندێكیان كێشەیان تێدایە.

 مەرجت چییە بۆ بەشداریكردن لەو جۆرە ئاهەنگانە؟

حەمید عوسمان: هەرچەندە نایكەم، بەڵام ئەگەریش بیكەم مەرجم ئەوەیە لە پێنج ژەنیار كەمترم لەگەڵ نەبێت. ئەو پارەیەشی پێمدەدەن شایستەی خۆم و هونەرەكەم بێت و بتوانم بەرهەمێكی پێ تۆمار بكەم. شوێنەكەش خێزانی بێت.

 كارەكانی ئەلبوومە نوێیەكەت بە كوێ‌ گەیشت؟

حەمید عوسمان: ئەلبوومەكەم  14 گۆرانییە و گۆرانییەكم كلیپ كردووە. گۆرانییەكانیش تازەن لە هەموو شێوازێك، گۆرانی ئاوێنەش دووبارە بووەتەوە، رەنگە بۆ سەری ساڵ بڵاوی بكەمەوە.

 چەندی تێچووە؟

حەمید عوسمان: زیاتر لە 20 هەزار دۆلار.

 پێشتر گۆرانیی هۆ كاكی پێشمەرگەت گوتەوە كە بەرهەمی هونەرمەند حەمەجەزا بوو، بەڵام دواتر وەستاندت، بۆچی؟

حەمید عوسمان: بنەماڵەی هونەرمەند حەمەجەزا پێیان باش بوو رایبگرین لەبەرئەوەی سیمبوڵێكی ئەو هونەرمەندەیە، منیش بەلامەوە ئاسایی بوو.

 بۆ گوتنەوەی پرست پێكردبوون؟

حەمید عوسمان: پێشتر بۆ هەموو ئیشەكانی مامۆستا حەمەجەزا پرسم پێكردبوون كە دیارە ئەو بەرهەمەش دەگرێتەوە، بەڵام بۆ ئەو گۆرانییە پێمنەگوتن، ئەوان گلەییشیان لەوە نەبوو كە پێمنەگوتبوون، چونكە ئێمە خزمی یەكدین، بەڵام گوتیان ئەو ئیشە رابگیرێت باشترە.

 خێزانت پێكەوەنا، بەڵام جیابوونەوە؟

حەمید عوسمان: بەڵێ لەسەر رەزامەندی هەردووكمان بوو، بەهۆی نەگونجانمان جیابووینەوە.

 بەمزووانە خێزان پێكەوە دەنێیتەوە؟

حەمید عوسمان: ئەوەیان قسمەتە، بەڵام رەنگە تا نزیكەی حەوت ساڵی دیكە خێزان دروست نەكەمەوە، چونكە خەونی گەورەم لە بواری هونەردا هەیە.

sarchawa:Rudaw

سه‌رچاوه‌ Hawler Radio 90.7 FM

درێژه‌ی بابه‌ت

کەژێ سروودێکی نیشتمانی بڵاودەکاتەوە

barzy

کەژێ هاوتا ئەسعەد، کچە گۆرانیبێژی کورد، رایگەیاند، کار بۆ سروودێکی نیشتمانی دەکات و بەم نزیکانەش بەشێوەی ڤیدیۆکلیپ بڵاویدەکاتەوە.


کەژێ هاوتا ئەسعەد،  راگەیاند “نوێترین كاری هونەریم، بریتییە لە سروودێك، کە لە بەرهەمەكانی پێشووترم جیاوازە و دەخوازم پەیامێكی جیاواز بگەیێنم”.

سروودەکە لە تێکستی عەبدولڕەحمان بێلافە و ئاوازی هاوتا ئەسعەدە، لە تورکیا کاری میوزیکی بۆ کراوە.

کەژێ، ئاماژەی بۆ ئەوەکرد “ئەم بەرهەمەم تەواو جیاواز دەبێت، بەتایبەتی لە رووی ناوەرۆكی تێكستەکەیەوە، تەنانەت ئاواز و میلۆدیەكەشەوە مەقامی (سەبا و عەجەم) لەخۆدگرێت”.

روونیشیکردەوە “لەم سروودەدا دەپرسین: كێ لەو شەڕە نەگریسەی بەرۆكی كوردستان بەر نادات، بەرپرسیارە؟ كە لە ماوەی زیاتر لە دوو ساڵی رابردوودا بە هەموو شێوەیەك ئەو شەڕە نەگریس و پڕ لە كاراستە هەموو تاكێكی كوردی بەرەو نا ئومێدی و بێتاقەتی بردووە”.

ئەوەشی ئاشکراکرد “پلانێكی باشمان داناوە بۆ کلیپکردنی سروودەکە، بەنیازین لەنێو ئاپۆرای جەماوەردا دیمەنەكانی وێنەبگرین، بۆ ئەو مەبەستەش لە گفتوگۆداین لەگەڵ یەکێک لە کۆمپانیاکانی بەرهەمهێنانی هونەری”.

کەژێ، لەبارەی بەرهەمی دیکەی هونەریی، رایگەیاند، لە دوای تەواوبوونی کاری سروودەکەی، کار بۆ یەکەم ئەلبوومی گۆرانیی دەکات و لەلایەن کۆمپانیایەکی هونەری لە تورکیا بەرهەمدێت.

کەژێ کچی هاوتا ئەسعەد، هونەرمەندی گۆرانیبێژە، تاوەکو ئێستا چەند گۆرانی و ڤیدیۆکلیپێکی بەشێوەی سینگڵ بڵاوکردووەتەوە.

sarchawa:Rudaw

سه‌رچاوه‌ Hawler Radio 90.7 FM

درێژه‌ی بابه‌ت

ئەمیری نانی وەیسی دەخوات

barzy

موحسین ئەمیری گۆرانیبێژی خەڵكی رۆژهەڵاتی كوردستان بۆ جەژنی نەورۆز گۆرانییەك بە زمانی كوردی بڵاودەكاتەوە.

موحسین ئەمیری، دانیشتووی شاری كرماشانە و تائێستا تەنیا بە زمانی فارسی گۆرانی گوتووە، بەڵام پێیخۆشە لەمەودوا بە زمانی كوردیش گۆرانی بڵێت.

ئەمیری  راگەیاند “لەبەرئەوەی لە ئێران بە پلەی یەكەم گۆرانی فارسی بڵاوترە، بۆیە تائێستا بە زمانی كوردی گۆرانیم نەگوتووە، بەڵام میلۆدیم بۆ زۆربەی گۆرانیبێژانی كورد ئامادە كردووە. بۆ جەژنی نەورۆزیش گۆرانییەك بە زمانی كوردی بڵاودەكەمەوە”.

ئەمیری ئەمساڵ بە دوو گۆرانیی هاوبەش لەگەڵ عەزیز وەیسی زیاتر دەركەوت، لەو دوو گۆرانییەدا وەیسی بە كوردی و ئەویش بە فارسی گۆرانی دەڵێن. ئەمیری گوتی “بەهۆی ئەو دوو گۆرانییە لەگەڵ عەزیز وەیسی، ناوبانگی زۆرم پەیدا كرد”.

sarchawa:Rudaw

سه‌رچاوه‌ Hawler Radio 90.7 FM

درێژه‌ی بابه‌ت

گرووپی میوزیکی کچانی رانیە ڤیدیۆ کلیپێک تۆمار دەکەن

barzy

گروپی میوزیکی کچانی رانیە، ڤیدیۆ کلیپیکی نوێ لە تورکیا و کوردستان تۆمار دەکەن، کە لە شەش گۆرانی پێکهاتووە، بڕیارە لە ماوەیەکی نزیکدا بڵاوبکرێتەوە.

رەوشت حەسەن سەرپەرشتیاری گرووپی کچانی رانیە   راگەیاند ” لەرووی هونەرییەوە ئەم ڤیدیۆکلیپە بەشێوازێكی پرۆفیشناڵ دروستکراوە، بۆیە ئێمە هەوڵدەدەین باشترین و جوانترین کاری هونەری پێشکەش بە گوێگران و هەوادارانمان بکەن”.

رەوشت ئاماژە بە ناوەڕۆکی گۆرانییەکە کردوو ، گوتی کە ئەو گەشتە گۆرانییە پێکهاتووە لە 6 گۆرانی کوردی، کاری دابەشکردن  میوزیک لەلایەن هونەرمەند محەمەد یاسین کراوە، هاوکات کاری تۆمارکردنی دەنگیش زیرەک حەمەدەمین جێبەجێیکردووە، یوسف لەشکری کاری دەرهێنانی بۆ ڤیدیۆکلیپەکە کردووە، هەروەها لە وڵاتی تورکیاش هەڤاڵ حەمەمەد کاری وێنەگرتنی کلیپەکەی گرتووەتە ئەستۆ.

رەوشت گوتیشی “بەنیازن لە ئایندەیەکی نزیکدا کۆنسێرتێک بۆ چاکسازی ژنان بکەن، ئەمەش وەک خزمەتێک بە بواری ئافرەتان لە کوردستان ئەنجامی دەدەین”.

گرووپی میوزیکی کچانی رانیە لە ساڵی ٢٠٠٥ دامەزراوە، کە تێیدا سێزدە کچی دەرچووی کۆلیژو پەیمانگەی هونەرەجوانەکان ئەندامی ئەم گرووپەن، لە چەندین کۆنسێرت و ئاهەنگدا گۆرانی و میوزیکی کوردییان پێشکەش کردووە، لەگەڵ ئەوەشدا خاوەن ڤیدیۆکلیپێکن بەناوی چوار گوڵ، ئەم ڤیدیۆکلیپەش دەبێتە دووەمین بەرهەمی هونەری گرووپی میوزیکی کچانی رانیە.

sarchawa:Rudaw

سه‌رچاوه‌ Hawler Radio 90.7 FM

درێژه‌ی بابه‌ت

سه‌میر عه‌بدوڵا به‌رهه‌مێكى عه‌لى مه‌ردان نوێ ده‌كاته‌وه‌

barzy

هونه‌رمه‌ندى ناوچه‌ بادینان سه‌میر عه‌بدوڵا  كار بۆ به‌رهه‌مێكى نوێ ده‌كات كه‌ پێشتر هونه‌رمه‌ند كۆچكردوو عه‌لى مه‌ردان وتویه‌تى.

له‌ لێدوانێكى تایبه‌ت به‌  سه‌میر عه‌بدوڵا  وتى نوێترین كارى هونه‌ریم كلیپ كردنى به‌رهه‌مێكه‌ به‌ ناوى “قه‌سه‌م” كه‌ پێشتر هونه‌رمه‌ندى كۆچكردوو عه‌لى مه‌ردان  وتویه‌تى، به‌شێوازێكى  نوێ كارى موزیكم بۆكردوو له‌ شارى دیاربه‌كر له‌ لایه‌ن “عه‌زیز یه‌كید” و كارى تۆماركردنى ده‌نگى له‌ شارى هه‌ولێر بۆ كراوه‌.

به‌رهه‌مه‌ نوێیه‌كه‌ى سه‌میر له‌ لایه‌ن باڤل سه‌رهه‌نگ له‌ وڵاتى هۆڵندا كارى وێنه‌گرتن  و ده‌رهێنانى بۆ كراوه‌، هۆگر بامه‌ڕنى وه‌ك به‌ڕێوه‌به‌رى به‌رهه‌م كارى له‌ كلیپه‌كه‌دا كردووه‌.

سه‌میر عه‌بدوڵا له‌ دایكبووى ساڵى 1982 شارى دهۆكه‌، خاوه‌نى چه‌ندین گۆرانى و به‌رهه‌مى كلیپه‌،دوایین كارى هونه‌رى به‌شدارى بووه‌ له‌به‌رهه‌مێكى هونه‌رى به‌  ناوى “هۆ خه‌ڵكینه‌” كه‌ له‌گه‌ڵ 8 هونه‌رمه‌ندى تربه‌ هاوبه‌شى وتویانه‌.

Radio Hawler

سه‌رچاوه‌ Hawler Radio 90.7 FM

درێژه‌ی بابه‌ت

پەرواز ئامادەکارى دەکات بۆ كلیپێكى نوێ

barzy

گۆرانیبێژ و به‌شداربووى به‌رنامه‌ى ئه‌ره‌ب ئایدڵ په‌رواز حسێن كار بۆ به‌رهه‌مێكى نوێ ده‌كات و هاوسه‌ره‌كه‌ى  گۆران ساڵح كارى ده‌رهێنانى بۆ ده‌كات.

هونه‌رمه‌ند په‌رواز حسێن ئاماده‌كارى ده‌كات بۆ وێنه‌گرتنى به‌رهه‌مێكى نوێ، ئاواز و هۆنراوه‌ى سامى  ئه‌رگوشى ئاماده‌ى كردووه‌.

به‌رهه‌مه‌ نوێیه‌كه‌ى په‌رواز   كارى  وێنه‌گرتنى هه‌ردى  سه‌لامى  ئه‌نجامى  ده‌دات  و گۆران ساڵحى هاوسه‌رى  كارى ده‌رهێنانى بۆ كردووه‌.

جگه‌ له‌ بڵاوكردنه‌وه‌ى  ئه‌م به‌رهه‌مه‌ نوێیه‌ى به‌ پێى زانیارییه‌كانى  په‌رواز سه‌ر قاڵى چه‌ند كارێكى مرۆیى و خێرخوازیه‌ بۆ ئاواره‌ و پێشمه‌رگه‌كان له‌ ئاینده‌یه‌كى نزیكدا.

سه‌رچاوه‌یه‌كى نزیك له‌ په‌رواز ئه‌وه‌ى ڕه‌تكرده‌وه‌  ئه‌و هونه‌رمه‌نده‌ گه‌شتى ده‌ره‌وه‌ى  كوردستانى كردبێت، ئه‌و وێنه‌یه‌شى كه‌ بڵاوكراوه‌ته‌وه‌ هى  نزیكى دوو ساڵ  پێش ئێسته‌یه‌ كه‌ به‌شدارى فێستیڤاڵێكى كردبوو له‌ وڵاتى كرواتیا.

په‌رواز حسێن به‌شداربووى به‌رنامه‌ى ئه‌ره‌ب ئایدڵ بوو بۆ وه‌رزى سێهه‌م هاوسه‌رى هونه‌رمه‌ند “گۆران سه‌ڵاح”ه‌، خاوه‌نى دوومنداڵه‌ به‌ ناوه‌كانى “گۆنا ، گه‌ردان” له‌ كارى هونه‌ریدا دوو به‌رهه‌مى هونه‌رى هه‌یه‌ یه‌كێكیان به‌ هاوبه‌شى له‌گه‌ڵ گۆرانى هاوسه‌رى وتویه‌تى.

sarchawa.nrt2

سه‌رچاوه‌ Hawler Radio 90.7 FM

درێژه‌ی بابه‌ت

سیریل به‌رهه‌مێكى دوێت له‌گه‌ڵ هاوسه‌ره‌كه‌ى بڵاوده‌كاته‌وه‌

barzy

هورنه‌مه‌ندى گۆرانیبێژ سیریل فه‌تاح  به‌رهه‌مێكى نوێ به‌ شێوه‌ى دوێت له‌گه‌ڵ هاوسه‌رەكه‌ى  نه‌به‌رد  جوامێر بڵاوده‌كاته‌وه‌.

سیریل فه‌تاح  سروودێكى نوێى به‌ناوى (وه‌ته‌ن) بڵاوده‌كاته‌وه‌  كه‌ به‌هاوبه‌شى له‌گه‌ڵ هاوسه‌ره‌كه‌ى نه‌به‌رد  جوامێر وتویه‌تى، كارى موزیكى نه‌به‌رد جوامێر كردوییه‌تى و هۆنراوه‌كه‌شى (كیانۆش جه‌وانمیرى) نووسیویه‌تى.

 له‌سه‌ر به‌رهه‌مه‌كه‌ى سیریل  ده‌ڵێت من و نه‌به‌رد  جوامێر به‌ هۆى دۆخى ئێستاى كوردستان به‌ پێویستمان زانى ئه‌و كاره‌ بكه‌ین، هیوادارین كارێكى باشمان كردبێت.

به‌ پێ زانیارییه‌كانى ئێن ئاڕ تى  دوو بڵاوكردنه‌وه‌ى ئه‌م به‌رهه‌مه‌  هاوبه‌شه‌ى سیریل و نه‌به‌رد  له‌ كاتێكدایه‌ سه‌رقاڵى كاكردنن بۆ به‌رهه‌مێك به‌ ناوى (ئه‌ی چه‌ندم خۆش ده‌وێیت).

سیریل فه‌تاح له‌ دایك بووى شارى سلێمانییه‌ خاوه‌نى چه‌ند به‌رهه‌م و كلیپێكه‌، دوایین كارى هونه‌رى بڵاوكردنه‌وه‌ى ئه‌لبومێك بوو به‌ هاوكارى ئاوازدانه‌ر هه‌ڵكه‌وت زاهیر به‌ ناوى (بابه‌).

sarchawa.nrt2

سه‌رچاوه‌ Hawler Radio 90.7 FM

درێژه‌ی بابه‌ت