نەهزەكانی نێو كۆمەڵی ئیسلامی حیزبێکی نوێ دادەمەزرێنن

KURDISTANI

ڕۆژانە هەواڵ …

ژمارەیەك سەركردەی ئیسلامی، سەرقاڵی دروستكردنی رەوتێكی نوێی سیاسین. ئەندامێكی پێشووی مەكتەبی سیاسی كۆمەڵیش دەڵێ‌ “ئەگەر ئیسلامییەكان نەگۆڕێن، حیزبێكی دیكە دروست دەبێت”.

ئارام قادر سەركردایەتی ناڕازییەكانی نێو كۆمەڵ دەكات

سەركردەكانی پێشووی كۆمەڵ كە بە “نەهزەكانی نێو كۆمەڵ” ناسراون، بە سەرۆكایەتی ئارام قادر، ئەندامی پێشووی مەكتەبی سیاسی كۆمەڵ، دەستیان بە جموجۆڵی دروستكردنی رەوتێكی سیاسی كردووە.

نەهزەكان لە ئەدەبیاتی ئیسلامیدا بە خەتی دووی ئیخوان لە باشووری كوردستان ناسراون كە لەسەر دەستی شێخ سدیق عەبدولعەزیز پەروەردە كراون، دواتر بزووتنەوەی راپەڕینی ئیسلامییان لە 22/11/1992 دامەزراند، لە ساڵی 1999 لەگەڵ بزووتنەوەی ئیسلامی، بزووتنەوەی یەكبوونی ئیسلامییان راگەیاند.

بەپێی زانیارییەكان، ئەو ئەندام سەركردایەتی و مەكتەبی سیاسییانەی كۆمەڵ كە لە كۆنگرەی سێیەمدا خۆیان كاندید نەكردەوە، سەرقاڵی دروستكردنی ئەو رەوتەن، ئەوانیش بریتین لە: ئارام قادر، تۆفیق كەریم، نازم عەبدوڵڵا، دارا حەمەدئەمین و شێخ موحسین. هەروەها محەممەد قەساب، سەرۆكی دەزگای مین و سامان عەبدوڵڵا، وەزیری پێشووی دەوڵەت لە حكومەتی حەیدەر عەبادی لەو پڕۆژەیەوە نزیكن.

نازم عەبدوڵلا: بۆشایی سیاسی لە گۆڕەپانەكەدا هەیە

نازم عەبدوڵڵا، ئەندامی پێشووی مەكتەبی سیاسی كۆمەڵ ڕایگەیاندووە “وەكو خۆم دەستم لە كۆمەڵ نەكێشاوەتەوە، بەڵام رەخنە و تێبینی و سەرنجی زۆرم لەسەر سیاسەت و ئیشكردنی هەیە”.

نازم عەبدوڵڵا پێیوایە حیزبی سیاسی بۆ چارەسەركردنی كێشەی سیاسی، ئابووری و كۆمەڵایەتیی كۆمەڵگە دروست بووە، بەڵام بە ئیسلامی و لایەنەكانی دیكە، نەیانتوانیوە ئەو كێشانە چارەسەر بكەن. نازم دەڵێ‌ “بۆشایی هەیە و دەبێت ئیسلامییەكان پڕۆژەیان هەبێت و توانای لە خۆگرتنی خەڵكیان هەبێت و گۆڕانكاری گەورە بكەن، ئەگەرنا بە دووری نازانم حیزبی دیكەی سیاسی دروست ببێت و ئەو بۆشاییە پڕبكاتەوە”.

لە سلێمانی بە لیدەرەكان ناسراون

بەپێی زانیارییەكان سەركردە ناڕازییەكانی كۆمەڵ لەگەڵ ژمارەیەكی گەنج كە زۆربەیان میدیاكارن و بەشێكیان لە رێكخستنی كۆمەڵ بوون، لە سلێمانی و هەولێر دەستیان لەو حیزبە كێشاوەتەوە، وەكو كۆمەڵێك رێكخراوی مەدەنی لە چوارچێوەی تۆڕێك بە ناوی “لیدەر” سەرقاڵی خۆڕێكخستنەوە و ئامادەسازین بۆ راگەیاندنی حیزب. هەوڵی دامەزراندنی كەناڵی تەلەفزیۆنی و رادیۆ و ماڵپەڕ دەدەن، ئێستاش گۆڤارێكی هزریی ئیسلامییان بە ناوی “گۆڤاری خاڵ” هەیە.

“لە گۆڕان باشترمان پێدەكرێ”

شاخەوان عەلی، ئەندامی پێشووی سكرتارییەتی رێكخراوی قوتابیانی كوردستان كە یەكێكە لە چالاكڤانانی رەوتەكە،  رایگەیاندووە  “ئەو رەوتە ئیسلامی نییە، بەڵكو رەوتێكی نیشتمانی و مەدەنییە و لەوپەری ئیسلامیی تێدایە تا ئەوپەڕی چەپ. سەركردەی زۆربەی لایەنە ئیسلامییەكانی تێدایە”.

شاخەوان عەلی كە جێگری سەرۆكی رێكخراوی دەنگە، دەڵێ‌ “پڕۆژەی گۆڕان لە كۆتاییەتی، ئێمە دەتوانین ئەو بۆشاییە پڕ بكەینەوە و لە گۆڕان باشتر ئیش بكەین”.

كۆمەڵ: خەڵكی ناڕازی تەنیا لە نێو ئێمەدا نییە

شوان رابەر، ئەندامی سەركردایەتی كۆمەڵ رەتیدەكاتەوە ئەو دەنگە نارەزاییەتییە تەنیا لە نێو حیزبەكەی هەبێت و دەڵێت “خەڵكی نیگەران و دانیشتوو لە نێو هەموو حیزبە ئیسلامییەكان هەیە. بابەتەكەش تەنیا پەیوەندی بە كۆمەڵ نییە، ئێمە هیچ ترسێكمان نییە لە دروستبوونی حیزبی دیكە، بەڵام واقیعەكە ئەوەمان پێدەڵێ‌ كە هیچ شتێك لە ئارادا نییە، بۆ دروستبوونی حیزبێكی ئیسلامی دیكە”.

شوان رابەر داوا دەكات ئیسلامییەكان پڕۆژەی سیاسی، نەتەوەیی و ئیسلامییان بەرفراوان بكەن و خەڵكی زیاتر خۆیان بگرن. لە بارەی ئەو جموجۆڵانەی لە نێو كۆمەڵ دەكرێت گوتی “ئەو جموجۆڵانەش تەنیا لە چوارچێوەی رێكخراوی كۆمەڵی مەدەنی و سەنتەری رۆشنبیرین، بڕوا ناكەم لەم قۆناغە حیزب دروستببێت”.

ئەبوبەكر عەلی: دروستبوونی حیزبێكی دیكە پێویستە

ئەبوبەكر عەلی، ئەندامی پێشووی مەكتەبی سیاسی یەكگرتووی ئیسلامیی كوردستان، سەبارەت بە دروستبوونی حیزبێكی دیكەی ئیسلامی لە كوردستان گوتووە “زەمینەی ئێستای كوردستان لە بارە بۆ دروستبوونی حیزبێكی دیموكراتیی موحافیزكاری نیشتمانی بە پاشخانی ئیسلامی كە لە سەر بنەمای پرۆژەی سیاسی تازە كە گڕوتین بە گۆڕەپانەكە ببەخشێ‌”.

ئەبوبەكر عەلی كە لە دوایین كۆنگرەی یەكگرتوو یەكێكبوو لە كاندیدەكانی پۆستی ئەمنیدار، پێیوایە خەڵكانێك هەن لە باشووری كوردستان تا سەر چاوەڕێی ئیسلامییەكان ناكەن “ئەگەر ئەو حیزبە بە سروشتی لە دایك نەبێت دواجار بە نەشتەگەری لە دایكدەبێت، بەڵام قەناعەتی خۆم ئەوەیە كە یەكگرتوو لەگەڵ تەواوی ئیسلامییەكان لە چوارچێوەی حیزبیكی نیشتمانی سەربەخۆ كۆببنەوە لە بواری بانگەواز و پەروەردە بەشێوازێكی دیكە رێكبخرێتەوە”.

ئەبوبەكر عەلی، ئاگاداری چالاكییەكانی ئەو رەوتەیە و دەڵێت “ئەو گروپە راوێژ و پرس و رایان پێكردوم و دروستبوونی حیزبێكی لەم جۆرە بە پێویست دەزانم”.

رەوتەكە دەچنە نێو پڕۆژەی سەلاحەددین بەهائەدین

عەبدوڵڵا ریشاوی، رۆژنامەڤان كە ئاگاداری ئەو جموجۆڵانەیە دەڵێ‌ “هەوڵێكە بۆ كۆكردنەوەی دەنگی ئیسلامییەكان، بەڵام بەشێوەیەكی گەورەتر لە كۆمەڵ و یەكگرتوو، واشدەزانم دواجار لە چوارچێوەی پڕۆژەكەی سەلاحەدین بەهائەدین ئەمنیداری یەكگرتوو وەكو لیستێكی ئیسلامی خۆیان دەبیننەوە، بۆیە تاوەكو هەڵبژاردنی داهاتوو حیزب و لیستی دیكە دروست نابێت”.
عەبدوڵڵا ریشاوی پێیوایە ئەم جموجۆڵانەی چەند سەركردەیەكی ئیسلامی بۆ دروستكردنی رەوتی نیشتمانی و مەدەنی بەبێ‌ پاشگری ئیسلامی دوا كارتی ئیسلامییەكان لە باشووری كرودستان دەبێت.

دەنگی ئیسلامییەكان لە كوردستان

ئێستا چوار حیزبی ئیسلامی لە باشووری كوردستان مۆڵەتی كاركردنیان هەیە. لە دوایین هەڵبژاردنی پەرلەمانی كوردستاندا لە مانگی ئەیلوولی 2013، یەكگرتووی كوردستان 186 هەزار 741 دەنگ كۆمەڵ 118 هەزار دەنگ، 574، بزووتنەوەی ئیسلامی 21 هەزار 834 دەنگ و بزافی چاكسازی و گەشە 1 هەزار 323 دەنگی هێنا.

لە كۆی ملیۆنێك و 968 هەزار 775 دەنگ هەر چوار لایەنە ئیسلامییەكە 328 هەزار و 472 دەنگیان هێنا كە دەكاتە 16.7%ی دەنگەكان.

ڕووداو

سه‌رچاوه‌ رۆژانە هەواڵ

درێژه‌ی بابه‌ت

Advertisements

وه‌ڵامدانه‌وه‌

Fill in your details below or click an icon to log in:

WordPress.com Logo

You are commenting using your WordPress.com account. Log Out / گۆڕین )

Twitter picture

You are commenting using your Twitter account. Log Out / گۆڕین )

Facebook photo

You are commenting using your Facebook account. Log Out / گۆڕین )

Google+ photo

You are commenting using your Google+ account. Log Out / گۆڕین )

Connecting to %s